Ховд их сургууль сургалт, судалгааны орчноо сайжруулах, дадлагын баазаа өргөтгөх, оюутнуудыг судалгаа шинжилгээний ажилд суралцуулахад хэрэглэгдэх орчин үеийн сургалтын тоног төхөөрөмж, багаж хэрэгсэлээр хангахад ихээхэн анхаарал тавин ажиллаж байна. Энэ хичээлийн жилд хамтын ажиллагаатай БНХАУ-н Шинжлэх ухааны академийн Шинжаан дахь “Газарзүй-экологийн хүрээлэн”-тэй хамтран цаг уурын байнгын ажиглалтын станцыг суурилуулав. Станцыг суурилуулах ажлыг тус хүрээлэнгийн профессор цаг уур, уур амьсгал судлаач Xu Junrong, эрдэм шинжилгээний ажилтан Ма Xuexi нар БШТС-ийн Газарзүй геологи, Математик мэдээлэлзүйн тэнхимийн багш нар хамтран гүйцэтгэсэн байна. 

Энэхүү станц нь агаарын температур, даралт, салхины хурд, чиглэл, хур тунадас, хөрсний гүний температур, чийгшил, нарны гийгүүлэлтийн үргэлжлэх хугацаа зэрэг 20 орчим үзүүлэлтийг хэмжиж тоон мэдээ материалын эх сурвалжийг бүрдүүлэх юм байна. 

“Сорилт туршилтын талбай”-д цаг уурын байнгын ажиглалтын станц байгуулсанаар оюутны зуны хээрийн дадлага, лабораторийн хичээл явуулахад ихээхэн ач холбогдолтой бөгөөд Цаг уур судлал хичээл, Ерөнхий Газарзүйн хээрийн дадлага, Ландшафт судлалын хээрийн дадлага, Байгалийн бүсчилсэн хээрийн дадлага, Газар зохион байгуулалт хөрс, судлалын хээрийн дадлага зэрэг хичээлүүдийн гол хэрэглэгдэхүүн болох юм.

Мөн Ховд их сургуулийн судалгааны тэргүүлэх чиглэлийн нэг нь цаг уурын дулаарал түүнтэй холбоотой дасан зохицох арга хэлбэрүүд, уур амьсгалын өөрчлөлтийн судалгаа ба энэхүү станцийн мэдээ материалыг үндэслэн Их Алтайн бүс нутгийн байгаль цаг уурын нөхцөлд шинжлэх ухааны үндэстэй үнэлэлт, дүгнэлт өгөх, хамтарсан судалгаа хийх, боловсруулалт хийхэд ихээхэн дөхөм болно. Байнгын ажиллагаатай станц нь Шинжааны Экологи Газарзүйн хүрээлэн, Ховд их сургуулийн идэвхтэй хамтын ажиллагааны эхлэл бөгөөд цаашид мэргэжилтэн солилцох, багш судлаачид мэргэжил дээшлүүлэх, дадлага хийх зэрэг олон талаар хамтран ажиллахаар төлөвлөж байна.