Аймгийн Нийгмийн бодлогын асуудал хариуцсан Засаг даргын орлогч Л.Энхбаяраар ахлуулсан ажлын хэсэг энэ сарын 14-ний өдөр Цэцэг суманд ажиллав.
Энэ үеэр сумын Эрүүл мэндийн төвөөр орж ажил байдалтай нь танилцлаа.
Тус төвийн хамт олон сумын хүн амд эрүүл мэндийн анхан шатны тусламж үйлчилгээ үзүүлж байна. Шүдний кабинет тохижуулж иргэдэд үйлчилж эхэлжээ.
Тусламж үйлчилгээний гол ачааллыг уул, уурхай, тээвэртэй холбоотой осол аваар, гэмтлийн дуудлага эзэлж байгааг эрхлэгч эмч Н.Солонго яриандаа онцоллоо.
Сумын хүн амын дунд элэг, уушгины өвчлөл харьцангуй их. Энэ нь тоосжилттой холбоотой гэж үзэж байна.
Иргэдийн болон нийгмийн эрүүл мэндийг сайжруулахад анхаарч сумын удирдлагууд энэ оны төсөвт 300 сая орчим төгрөг төсөвлөжээ.
Гэвч төсөл хөтөлбөр боловсруулах, хэрхэн хэрэгжүүлэх талаар төлөвлөсөн зүйлгүй, хамтран ажиллах талаар санаачилга муутай байгааг сумын удирдлагууд онцолж ажлаа сайжруулах чиглэлийг өглөө.