Ардын Хатанбаатар С.Магсаржавын нэрэмжит Зэвсэгт хүчний 123 дугаар ангид 2024 оны хоёрдугаар ээлжээр Увс, Говь-алтай, Баян-өлгий болон Ховд аймгаас татагдсан залуус цэргийн алба хааж байна.

Хугацаат цэргийн алба хааж буй дайчид 45 хоногийн сургалтад хамрагдаад өнөөдөр /2024.11.30/ цэргийн тангараг өргөж тугт хүндэтгэл үзүүллээ. 

Хүндэтгэлийн энэхүү арга хэмжээнд аймгийн Засаг дарга, Баруун бүсийн зөвлөлийн дарга М.Амарсанаа, Засаг даргын орлогч Э.Уртнасан, Засаг даргын Тамгын газрын Цэргийн штабын дарга, хурандаа Б.Ганхуяг болон албаны бусад төлөөлөл, аав, ээж, ар гэрийнхэн нь оролцов.

Цэргийн алба хаагчид, тэдэнд цэргийн эрдэм, эх орноо батлан хамгаалах чиг үүргийг зааж буй ангийн бие бүрэлдэхүүн, офицер, ахлагч нар, алба хаагчдын аав ээж, ар гэрийнхэнд нь баяр хүргэлээ.

Ээж аавын хүүхдүүд 

Эх орны хөвгүүд болж байна. Үндсэн хуулиар хүлээсэн иргэний цэргийн үүргээ биелүүлж албаа нэр төртэй хаахыг хүсье. 

Эх орныхоо хөгжил цэцэглэлт, бүтээн байгуулалтад үнэтэй хувь нэмрээ оруулах үүрэг хүлээж хугацаат цэргийн албанд хүүгээ үдсэн аав ээжид нь чин сэтгэлийн талархал илэрхийлье хэмээн хэлсэн үгэндээ онцоллоо. 

Цэргийн алба хаагчдад нэг жилийн хугацаанд цэргийн эрдэм заахаас гадна Англи хэл, компьютер, жолооны мэргэжил олгох сургалтад хамруулах болсон. Мөн төрийн албанд орж ажиллах нэг шалгуур болсон учраас сүүлийн жилүүдэд цэргийн алба хаах сонирхолтой залуусын тоо нэмэгдэж байна.