Монгол улсын Үндсэн хуулиар хүлээсэн иргэний цэргийн үүргээ биелүүлж Ховд аймгаас 2025 оны нэгдүгээр ээлжийн цэрэг татлагаар хугацаат цэргийн албанд татагдан Үенч сум дахь Хилийн цэргийн 0130 дугаар ангид алба хааж халагдсан хилчин дайчдыг угтаж авах үйл ажиллагаа өнөөдөр /2025.05.01/ аймгийн төв талбайд боллоо.
Хилчин дайчдыг угтан авах ёслолд аймгийн Засаг дарга М.Амарсанаа болон Цэргийн штаб, сумдын Засаг даргын Тамгын газрын дарга нар хилчин дайчдын аав, ээж, ар гэрийнхэн нь оролцов.
Энэ үеэр албаа нэр төртэй хааж бусдыгаа манлайлсан нэр бүхий зарим дайчдыг шагнаж урамшууллаа.
Аймгийн Засаг дарга М.Амарсанаа:
Ээж аавын хүү байсан залуус өнөөдөр "Эх орны хүү" боллоо. Өргөсөн тангарагтаа үнэнч байж эх орныхоо өмнө хүлээсэн үүргээ амжилттай биелүүлэн албаа нэр төртэй хаасанд баяр хүргэн, цаашдын ажил амьдралд нь сайн сайхныг хүсэн ерөөв.
Алба хаагчид нэг жилийн хугацаанд цэргийн эрдэмд шамдан суралцахын зэрэгцээ “Нисгэгчгүй нисэх хэрэгсэл дроны нисгэгч”, “Хилчин”, “Шалган нэвтрүүлэх алба”, “Жолооч” зэрэг мэргэжлүүдээр сургалтад хамрагдаж, мэргэжил эзэмшиж, хувь хүний ур чадвараа дээшлүүлсэн байна.