Баруун бүсийн ууган их сургууль болох Ховд их сургууль нь 2019-2020 оны хичээлийн жилд 127 багш, 71 ажилтан, докторын 65, магистрын 789, бакалаврын 1764 суралцагчтайгаар шинэ хичээлийн жилийн үйл ажиллагаагаа эхлүүлж байна. Монгол орны баруун бүс нутагт багшлах боловсон хүчнийг бэлтгээд даруй 40 жил болж буй тус сургуулийн 40 дэх удаагийн хичээлийн шинэ жилийн нээлтийн үйл ажиллагаа өнөөдөр боллоо.
Нээлтийн үйл ажиллагаанд Аймгийн ИТХ-ын дарга Г.Пүрэвганди, Ховд аймгийн БСУГ-ын мэргэжилтэн О.Өлзийсайхан, ХИС-ийн захирлын үүрэг гүйцэтгэгч Б.Нямдорж, Сургалт эрхэлсэн дэд захирал О.Мөнхжаргал болон бүрэлдэхүүний сургуулийн захирлууд, МУ-ын гавьяат багш Б.Цэрэнжав, Д.Батчулуун, эрдэмтэн багш нар, хамтран ажилладаг байгууллагуудын төлөөлөл, оюутнууд оролцов.
Үйл ажиллагааг нээж, ХИС-ийн захирлын үүрэг гүйцэтгэгч доктор, профессор Б.Нямдорж нийт профессор, багш ажилчид, оюутнууд болон ХИС-ийн дэргэдэх математик, байгалийн ухаан, гадаад хэлний гүнзгийрүүлсэн сургалттай ахлах сургуулийн сурагчиддаа хичээлийн шинэ жилийн мэнд хүргэж, ажил хөдөлмөр, хичээл сурлагад нь амжилт хүслээ.