УИХ-ын гишүүн, Ховд аймгийн Нутгийн зөвлөлийн дарга С.Бямбацогтын санаачилгаар түүний Ажлын алба “Зуслангийн нэг өдөр” нэртэй өдөрлөг зохион байгууллаа. Энэ үеэр Улаанбаатар хот болон Ховд аймаг дахь Бүсийн оношилгоо эмчилгээний төвийн нарийн мэргэжлийн эмч нар иргэдэд эрүүл мэндийн үнэ төлбөргүй үзлэг оношилгоо хийж, зөвлөгөө өглөө. Мөн үсчид иргэдийн үсийг үнэгүй засах үйлчилгээ үзүүлж, аав ээжүүд болон хүүхдүүдийн дунд олон төрлийн хөгжөөнт уралдаан тэмцээн зохиогдсон юм. Хүн малын зоо тэнийж, нар хур тэгширсэн дэлгэр зуны цагт ийм арга хэмжээ зохион байгуулсан нь үнэхээр нүдээ олсон ажил болсныг олон хүн үнэлж байсан юм. Тус өдөрлөгт нийт 3 мянга гаруй иргэн хамрагдаж дурсамж дүүрэн нэгэн өдрийг хамтдаа өнгөрүүлсэн байна.

“Зуслангийн нэг өдөр” өдөрлөгийн бас нэгэн оргил хэсэг нь урлагийн тоглолт байлаа. Тоглолтод УДБЭТ-ын гоцлол дуучин МУСТА А.Мөнхтөр, Сүлд чуулгын дуучин Сүнжидмаа, Ховд аймгийн Хөгжимт драмын театрын дуучин МУСТА Лхамхүү, МУСТА Одгэрэл нарын уран бүтээлчид оролцож үзэгчдийн сэтгэлд хүрсэн олон сайхан уран бүтээлээрээ бэлэг барьлаа. Мөн өдөрлөгийн үеэр асуулт хариултын АХА тэмцээн, үдшийн цэнгүүн болж, дэлгэцийн уран бүтээлд цахиур хагалж буй “SINGLE LADIES-3”уран сайхны киног үзэгчдийн хүртээл болголоо. Ховд аймгийн малчид УИХ-ын гишүүн С.Бямбацогтын Ажлын албанаас санаачилсан “Зуслангийн нэг өдөр” өдөрлөгийг цаашид уламжлал болгон жил бүр зохион байгуулж байхыг хүсч байлаа.